ສາເຫດທີ່ແພດໝໍລາວ ມີຄວາມຈໍາເປັນຕ້ອງໄດ້ເປີດເຜີຍຊື່ ແລະ ທີ່ຢູ່ ຂອງຜູ້ຕິດເຊື້ອ ໂຄວິດ-19

47560

ໃນໂອກາດຖະແຫຼງຂ່າວຕໍ່ສື່ມວນຊົນ ໃນຕອນແລງວັນທີ 25 ມິນາ 2020 ນີ້ ທີ່ກະຊວງສາທາລະນະສຸກ, ນະຄອນຫຼວງວຽງຈັນ, ທ່ານພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ ໄດ້ຕອບຂໍ້ຂ້ອງໃຈຂອງນັກຂ່າວ ເຖິງກໍລະນີທີ່ຕ້ອງໄດ້ເປີດເຜີຍຊື່ ແລະ ທີ່ຢູ່ຂອງຄົນເຈັບທີ່ຕິດເຊື້ອພະຍາດໂຄວິດ-19 ວ່າ: ພວກເຮົາຕ້ອງຂໍອະໄພກັບຄອບຄົວຂອງຄົນເຈັບທີ່ຕິດເຊື້ອພະຍາດໂຄວິດ-19 ໃນກໍລະນີທີ່ຕ້ອງໄດ້ເປີດເຜີຍຊື່ ແລະ ຂໍ້ມູນບາງຢ່າງກ່ຽວກັບຄົນເຈັບທີ່ຕິດພະຍາດຮ້າຍແຮງ; ແຕ່ໂດຍທຳມະດາທົ່ວໄປແລ້ວ, ແພດໝໍຂອງພວກເຮົາ ແມ່ນມີຈັນຍາບັນຂອງຕົນ ໃນການປົກປ້ອງຄວາມລັບ ແລະ ສິດທິຂອງຄົນເຈັບທົ່ວໄປທຸກໆຄົນ

ຍົກເວັ້ນແຕ່ໃນກໍລະນີມີການລະບາດຂອງພະຍາດຮ້າຍແຮງ ເໝືອນດັ່ງໃນຄັ້ງນີ້, ຖ້າຜູ້ໃດຫາກປົກປິດຄວາມຈິງ ກໍ່ຈະຖືກປະຕິບັດວິໄນ ແລະ ຮັບໂທດຕາມລະບຽບກົດໝາຍຂອງບ້ານເມືອງຢ່າງເຂັ້ມງວດ, ເຊິ່ງກົດໝາຍວ່າດ້ວຍການຄວບຄຸມພະຍາດຕິດຕໍ່ ກໍ່ໄດ້ມີຂໍ້ກໍານົດໄວ້ຢ່າງຈະແຈ້ງຢູ່ແລ້ວ.

ວິທະຍຸ ກະຈາຍສຽງແຫ່ງຊາດ